根據外媒報道，Samsung 已經喺印度同埋南韓嘅 Samsung News App 入面發出停運公告，確認服務會喺 2026 年 12 月 21 日 UTC 時間 00:00 正式終止。今次受影響嘅範圍相當全面，除咗獨立嘅 App 本身之外，用家擺喺主介面嘅 Widget 小工具，以至平時喺主畫面滑到最左邊嗰一頁專屬媒體頁面，全部都會一併停用。平時習慣喺嗰度睇即時新聞、即時體育賽果同埋股市行情嘅 Galaxy 用家，喺服務停運之後就無法再透過原裝介面睇到呢啲內容。
喺個人私隱同數據處理方面，Samsung 喺公告入面寫得好清楚，一旦服務停止，系統就會將用家嘅個人檔案、使用記錄同所有個人化設定資料全面刪除。唯一例外係如果當地法例有特別規定要求品牌保留特定資料一段時間，相關數據先會喺法定期限過咗之後先至徹底銷毀。雖然現時停運通告只喺印度同南韓市場出現，但一般相信其他地區好大機會都會跟隨，實際安排就要等各地官方正式公佈。
講返呢個服務嘅歷史，Samsung 喺自家裝置嘅最左頁資訊欄其實轉過好多次名。最早係喺 2017 年 4 月 21 日推出嘅 Bixby Home；去到 2019 年 10 月 30 日就改組成為 Samsung Daily；到咗 2020 年底隨住 One UI 3.0 推出，又換成 Samsung Free；最後去到 2023 年 4 月 18 日先至正式改名為而家嘅 Samsung News。連埋早前 Samsung 宣佈喺電視同 Smart Monitor 停用 Daily+ 服務，可以睇得出品牌而家正積極精簡一啲重疊或者用量較低嘅原生軟件服務。至於 Samsung News 停用之後會有咩填補呢個空缺，官方暫時未有任何公佈，亦都無交代會唔會出新服務頂替。
由 Bixby Home 一路演變到 Samsung News，呢個陪伴咗 Galaxy 用家多年嘅原裝資訊板塊即將劃上句號。由於現時 Galaxy 裝置本身已經提供切換去 Google Discover 嘅選項，未來 Samsung 會唔會直接全面轉用 Google 服務，抑或喺之後嘅介面更新再有新動作，仍有待官方進一步釐清。
來源：SamMobile
