7000mAh 電池、2 億像素挑戰真旗艦！HONOR 600 Pro 實測：次旗艦價錢玩到真旗艦體驗？-ePrice.HK

市場定位與香港版本售價

HONOR 600 Pro 港版目前提供兩個版本供用家選擇。12GB RAM 配搭 256GB ROM 嘅版本官方定價為 HK$6399 ，而更高容量嘅 12GB RAM 配搭 512GB ROM 版本則售 HK$6899 (評測刊出時)。先不計算推廣優惠，以同樣是  Snapdragon 8 Elite 處理器的手機來講，價錢的確比其他品牌類似型號為平。官方亦承諾提供 4 次系統升級及 5 年安全性更新，保證設備嘅生命週期。

▲ 開賣時的優惠

外觀設計與屏幕規格

近來，HONOR 600 Pro 的旭日橙色系，HONOR 香港自製了跟 iPhone 17 Pro Max 在顏色上致敬話題，結果在Social Media 大洗版。版主當然，要借了這款話題橙色機作實測。攞上手第一感覺係佢隻橙新色非常搶眼，配埋防指紋嘅啞光玻璃機背，手感質感都顯得相當高級。雖然機身內置咗 7000mAh 大電池，但厚度成功控制喺 7.8 毫米，重量大約係 200 克，同 iPhone 17 Pro Max 相若，完全冇以前大電手機嗰種笨重感。
 

 
屏幕規格方面採用咗 6.57 吋 AMOLED 面板，解像度達到 2728 x 1264。最誇張嘅係其峰值亮度去到 8000nits，即使喺旺角街頭烈日下睇地圖都清清楚楚。防護能力亦係一大亮點，除咗基本嘅 IP68 外，仲支援極罕見嘅 IP69 甚至 IP69K 防水防塵級別，代表佢對於高溫高壓水流都有一定抵抗力。

▲ 最令我驚喜嘅係屏幕邊框，HONOR 今次將邊框縮減到只有 0.98 毫米，視覺上接近全螢幕效果。

效能與跑分

核心硬件方面，HONOR 600 Pro 採用咗 3 納米製程嘅 Snapdragon 8 Elite 處理器。我哋透過 Geekbench 進行實測，單核心得分約 2965 分，多核心 8933 分。喺日常操作如滑動社交平台時表現極之流暢，而喺高負載嘅打機測試中，以最高畫質運行亦可以穩定維持喺 60fps，測試半小時後機身溫度僅屬微溫，反映其散熱設計相當成熟。今次版主亦有 PC Mark 工作 3.0 效能及 Geekbench 6 的跑分供大家參考。

續航力與充電效率

呢部機最核心嘅賣點係嗰粒 7000mAh 矽碳負極電池。我哋進行咗 1 小時 YouTube 影片播放測試，喺連接無線網絡、50% 亮度及音量嘅情況下，一小時僅耗電 3%。以此數據推算，滿電狀態下可以連續觀看影片超過 33 小時。對於一般香港用家日常返工放工、睇片覆訊息，兩日一充絕對係游刃有餘。充電方面則支援 80W 有線快充同 50W 無線快充，由零開始大約 50 分鐘就可充滿電量。

實用 AI 工具一覽

HONOR 600 Pro 採用 MagicOS 10 系統，並引入咗多項針對日常使用嘅 AI 工具。先數一數，包括有AI 側邊欄：會根據你而家做緊嘅事，推薦相關 AI 工具同常用功能，例如搜尋、翻譯、分屏或者浮窗操作，令你少幾步就做到 。Magic 文字：識別圖片、截圖或者畫面上的文字，之後可以複製、搜尋或做後續操作，適合見到海報、文件、網頁文字時用 。AI 字幕：將影片或語音內容轉成字幕亦支援即時翻譯，方便睇外語片、上堂、開會時使用 。AI 翻譯：可以做即時翻譯，常見用途包括旅行、面對面交流、聽講座或睇外語內容 。通話翻譯：講電話時即時翻譯雙方說話，減少語言障礙，偏向語音對話場景 。AI 換臉／變聲偵測：用來偵測影片或聲音有冇經過 AI 偽造，屬於安全辨識功能 。AI 幫寫：幫你草擬、改寫、潤飾或校對文字，常用於訊息、筆記、文案或工作內容 。AI  智能感知：手機會用感應器和使用情境去配合操作，屬於系統層面的智慧互動設定 。AI  隔空手勢：可以唔接觸屏幕，用手勢控制某些操作，例如滑動、翻頁或接聽，適合雙手唔方便時用 。AI 記憶：幫你記住常用內容或習慣，方便日後快速呼叫 。榮耀任意門 ：通常係圈選或長按內容後，系統自動推薦相關 app 或動作，例如搜尋、分享、開地圖 。智能建議：根據你當前畫面提供下一步建議，例如開 app、翻譯、搜尋或分享 。AI 鍵：可以設定快捷觸發某個 AI 功能或助手入口，方便一鍵開啟 。

不過，最好玩及一定要講的，是 AI 圖轉影片  2.0

超好玩 AI Video

AI 圖轉影片 2.0 嘅玩法比起上代更加人性化同智能化。在相簿入面，多了一個「創作」的位置，揀「圖片建立影片」，入面有 14 款預設效果及 1 款自行創作。只要你照指示，輸入相片，預設的文字 Prompt 就可以幫你製作最長 5 秒的影片，比起坊間的 AI 成生創作影片工具都易用。若果你創意無限，可以揀「自由創作」，自行輸入文字 Prompt 製作影片。
   

▲ 一齊睇下試玩「AI 圖轉影片 2.0 」的 AI Video  效果。 

相機鏡頭畫質與變焦實測

相機配置同樣強，Honor 600 Pro 其中最受注目的莫過於嗰粒 2 億像素嘅超高解像度主鏡頭。呢粒鏡頭配合 1/1.4 吋感光元件，最直接嘅好處係提供極之強大嘅後期裁剪空間。對於香港用家嚟講，有時影街景，未必可以次次企到最近去取景。2 億像素模式可以讓用家影完相之後，再喺手機入面隨意裁剪出想要嘅部分，而畫質依然維持到高水準。喺光線充足嘅環境下，畫面嘅細節還原度不錯，試相中的石頭，Zoom 埋去，當中的紋理都清晰可見。當去到夜晚，系統會透過像素合成技術提升進光量，配合 f/1.9 大光圈，可以令夜拍畫面更加乾淨、雜訊更少。

▲ 2 億像素模式

▲ 裁切出來的效果

除咗主鏡頭，另外一個亮點係 5000 萬像素嘅長焦鏡頭。雖然市面上唔少中階機都會配備長焦，但通常像素都比較低，而 HONOR 600 Pro 呢粒高像素長焦鏡頭就提供咗更好嘅實用性。佢原生支援 3.5 倍光學變焦，呢個焦段影人像或者街拍係最舒服嘅。高像素嘅優勢在於，當用家需要推到 10 倍甚至更遠嘅數碼變焦時，系統可以利用高像素提供更多原始數據進行運算，令放大後嘅影像唔會出現嚴重嘅油畫感。加上佢支援 OIS 光學防震，即使喺手持拍攝長焦畫面時，亦能有效減少因手震導致嘅模糊。喺日拍環境下，呢粒長焦鏡頭嘅色彩表現同主鏡頭非常接近，保證咗成組鏡頭嘅一致性，絕對唔係一般湊夠數嘅副鏡。

▲ 1X 

▲  3.5X 
 

 ▲  日拍
    ▲  日拍及室內相

2026 年最強性價比之選？

綜合嚟講，HONOR 600 Pro 喺 HK$6000 價位段基本上難逢敵手。佢雖然比上代售價有所提升，但換嚟嘅係頂級旗艦晶片、極致嘅續航力以及更強嘅耐用度，加上話題性嘅橙色機身，若果你嘅 Budget 就六至七蚊左右，HONOR 600 Pro 嘅表現，應該令你滿意。

最新新聞