Google Pixel 11 系列愈來愈多料曝光！繼爆料大神 Evan Blass 放出一系列 Pixel 11 宣傳素材之後，其他熟悉嘅爆料人亦陸續帶來更多消息。當中 Pixel 11 Pro 系列除咗有望提升續航力，充電速度更加可能大幅升級；至於早前盛傳嘅機背彩色燈效，正式名稱亦可能唔係大家一直叫開嘅「Pixel Glow」。到底今次仲有咩新料？睇下文啦！
續航力增至 30 小時以上
爆料人 OnLeaks 日前公開 Pixel Watch 5 規格介紹時，順便加入一張 Pixel 11 Pro 系列嘅宣傳資料。從圖片可見，Pixel 11 Pro 系列嘅官方日常續航力，將由上代標示嘅 24 小時以上，提高至 30 小時以上。
早前有傳 Pixel 11 系列嘅電池容量可能會輕微縮水，令部分網友擔心實際續航力會受到影響。不過按照今次流出嘅官方宣傳資料，Google 似乎已透過新一代處理器、系統調校或者其他省電技術，抵消電池容量縮減帶來嘅影響，大家暫時可以鬆一口氣。
傳 5 分鐘即可充至 55%
比起續航力，今次更加搶眼嘅可能係充電速度。爆料資料顯示，Pixel 11 Pro 系列最快只需充電 5 分鐘，就能夠將電量提升至 55%，相比前代約 30 分鐘嘅充電表現，升幅可謂相當誇張。
不過，Google 在充電速度嘅相關說明中，仍然提到 Pixel 11 Pro 需要配合 30W 充電器，而 Pixel 11 Pro XL 就要使用 45W 充電器，表面上未見充電器功率有大幅提升。因此，Google 今次有可能透過放寬充電功率限制，或者重新調整充電曲線，令手機在短時間內補充更多電量。
當然，目前資料仍然來自爆料，實際充電速度、測試條件以及是否需要指定充電器配合，都要等 Google 正式公布先有答案。如果 5 分鐘充至 55% 最終屬實，Pixel 手機過往充電偏慢嘅問題，今次就真係有望一次過解決。
Pixel Glow 正式名稱可能叫「HiLight」
除咗續航力同充電之外，Pixel 11 系列另一項焦點，就係早前傳聞加入嘅機背彩色 LED 燈效。消息指 Google 可能會將彩色 LED 整合到機背補光燈之中，並配合 Gemini、來電通知或者其他系統功能，顯示不同顏色及燈光效果。
呢項功能之前一直被外界稱為「Pixel Glow」，不過爆料人 Roland Quandt 公開嘅法文版介紹顯示，其正式名稱可能會叫做「HiLight」。換句話說，「Pixel Glow」可能只係開發期間使用嘅內部代號，並非最終推出市場時採用嘅名稱。
不過版主覺得，相比起比較普通嘅「HiLight」，「Pixel Glow」無論辨識度定係同 Pixel 品牌嘅連繫都更強。最終會用邊一個名，甚至會唔會因應不同市場改名，就要留待 Google 發表 Pixel 11 系列時先揭曉。
如果爆料屬實，Pixel 11 Pro 系列今代除咗續航力有所提升，充電速度同機背燈效亦會成為主要賣點。尤其係 5 分鐘充至 55% 呢個數字，對 Pixel 手機而言絕對算係一次大躍進。大家又覺得快速充電吸引，定係機背 HiLight 燈效更加實用呢？
