84g 輕巧機身 IP69K 加軍規防護
傳統對講機通常有一定體積，帶去踩單車、滑雪或者行山，未必算得上方便。RugOne XLink-7 就採用近似真無線耳機盒大小的設計，機身重量只有 84g，可以利用磁吸背夾、臂帶或者掛繩固定在身上，減少進行戶外活動時的負擔。
顏色方面，XLink-7 提供 Jet Black 極致黑及 Taupe 淺褐色兩款選擇。雖然機身細細部，但防護能力就未有縮水，同時通過 IP68、IP69K 防塵防水認證以及 MIL-STD-810H 軍規標準，可於 -30°C 至 55°C 環境下運作，應付落雨、風沙以至冰雪環境。
有 4G 網絡就用到 最多三人同時傾
XLink-7 並非利用傳統無線電頻率通訊，而是透過全球 4G LTE 網絡連線。簡單來講，只要所在位置有流動網絡覆蓋，就不會受到一般對講機的通訊距離限制，適合單車隊、滑雪、露營，甚至戶外工作團隊使用。
裝置支援全雙工 Full-Duplex 語音通話，最多可以讓三人同時對話，使用方式會比較接近平時打電話，毋須每次講完一句都要放開按鍵，溝通自然好多。
不過要留意，4G 對講功能始終需要流動網絡配合。官方資料顯示產品會設有包含 12 個月服務的 SIM Bundle 版本，以及讓用戶自行使用兼容 nano-SIM 的 Standard Version，實際開賣版本及相關服務收費，就仍有待代理進一步公布。
AI 降噪對應踩單車、滑雪場景
既然產品名稱加入「AI」，XLink-7 自然唔只係一部普通 4G 對講機。裝置內置 AI 語音助理，用戶可以透過語音查詢即時資訊、進行 AI 問答，亦可以直接更改裝置設定。
戶外使用最麻煩的地方，通常不是聽不到對方，而是對方只聽到一堆風聲。XLink-7 因此加入獨立 AI 降噪晶片及麥克風，官方聲稱最高可以處理 55dB 環境噪音，並針對最高時速 30km/h 的單車及40km/h 的滑雪場景進行收音優化，盡量過濾風聲及其他環境噪音。
產品同時附送 Wireless Remote Ring 無線藍牙控制環，可以安裝在單車把手或者滑雪杖上。使用者毋須離開把手，亦能一鍵進行通話及控制，對踩單車的朋友來講會比直接在機身撳掣安全。
三重衛星定位 連按五次即啟動 SOS
戶外產品除了通訊，安全功能同樣重要。XLink-7 支援 GPS、GLONASS 及北斗三重衛星定位，配合 RugOne XLink 手機應用程式，可以建立及管理群組、查看隊友狀態，亦能分享和追蹤即時位置。
機身另外設有獨立 TorchX 高亮度電筒及緊急 SOS 模式，遇到意外時連按五次按鈕，就會發出警報聲並將位置傳送出去。當然，相關定位及求救功能仍然會受到衛星訊號、流動網絡及裝置電量等因素影響，戶外活動前都係應該做好基本準備，不能單靠一部裝置。
87 小時待機 四款配件全部跟機
續航方面，XLink-7 內置 1,050mAh 電池，官方標示最長待機時間為 87 小時，連續通話時間則可達 10 小時，正常一日戶外活動理論上已經相當夠用。
今次跟機配件亦算幾齊，包裝內會附送：
– Wireless Remote Ring 無線藍牙控制環，並提供長、短兩款綁帶
– Magnetic Back Clip 磁吸背夾
– Sports Armband 運動臂帶
– Secure Lanyard 防護掛繩
換言之，無論踩單車、滑雪、攀岩或者行山，都可以按場景選擇不同佩戴方式，毋須買機之後再逐件配件慢慢搵。
售價與發售詳情
RugOne XLink-7 建議零售價為 HK$1,099，並會在香港電腦通訊節 2026 期間公開展出，展位號碼為 F35。
以千一蚊有找的價錢來講，XLink-7 最大賣點不是單純將傳統對講機縮細，而是結合 4G 通訊、全雙工通話、AI 降噪、衛星定位及 SOS 功能，再加上配件一次過跟齊。對一般用家來講未必是必需品，但如果經常一班人踩單車、滑雪或者進行戶外活動，這種不用受傳統對講距離限制的設計，的確有其吸引力。
