- $2XXX 中階機推介
分區列表
左定坤 (Cho Ting Kwan) 2026-08-31 08:31 | Apple
摺機專用筆身變短變粗 支援磁吸充電
根據 Mark Gurman 掌握嘅資料顯示，Apple 內部確實製作過摺疊式 iPhone 專用嘅 Apple Pencil 測試版本，而且認真考慮過推出市場。呢款手寫筆嘅外形同現時 iPad 用開嘅版本好唔同，為咗配合摺疊式手機比較特別嘅機身高度，筆身設計得相對更短、更粗。喺日常運作方面，呢款配件嘅使用方式同其他 Apple Pencil 差唔多，可以靠磁力直接吸附喺手機側面，方便用家收納同埋即時充電。
不過，呢個方案喺實際使用上遇到唔少問題。如果用家將部手機展開嚟用，但當刻又唔需要用到手寫筆，掛喺側面嘅配件就會令收納變得有啲尷尬，影響單手握持嘅手感。加上摺疊螢幕本身表面比較敏感同脆弱，用類似 Stylus 嘅尖銳裝置喺上面書寫，好容易會喺柔性面板上留低難睇嘅壓痕或者刮傷。
違背 Steve Jobs 當年理念 短期內難以推出
除咗硬件結構嘅限制之外，Apple 自身嘅產品傳統亦係一大考慮。回顧 2007 年第一代 iPhone 發布嗰陣，Steve Jobs 曾經講過「Nobody wants a stylus」，確立咗 iPhone 用手指直接觸控嘅核心定位。Mark Gurman 認為，如果 Apple 喺手機產品重新加入觸控筆，變相打破咗當年嘅立場。基於保護螢幕耐用度同埋操作體驗嘅考慮，佢坦言好難想像 Apple 會喺下個月推出摺疊式 iPhone 嗰陣，順便發表呢款專用配件。
9 月 9 號發布會落實 邀請函拆解機械光圈暗示
除咗摺機配件嘅消息，Apple 亦正式出咗 9 月份發布會嘅傳媒邀請函，落實發布會喺 9 月 9 號舉行，主題定為「Surprise and shine」。Mark Gurman 對邀請函入面嘅設計作出分析，認為圖中嗰道耀眼嘅光芒，好大機會係暗示緊 iPhone 18 Pro Max 將會加入機械光圈設計，提升相機鏡頭喺唔同光線環境下嘅調節能力；至於圖像入面嘅天空背景，就預示緊新一代 iPhone 會帶來全新嘅外觀機身配色。
來源：Power On 專欄
