HUAWEI 推出三折疊旗艦 Mate XT 2 非凡大師：採用全新自家 Logic Folding 晶片 Kirin 9050 Pro-ePrice.HK

全新設計

HUAWEI Mate XT 2 採用左右翻折嘅雙翼展開結構，機身厚度維持喺 3.5mm，入面同時整合咗內外兩塊螢幕，打開之後可以變成 10.2 吋 3K 解像度嘅折疊大螢幕。機身結構用上三折疊玄武架構，外螢幕採用玄武崑崙玻璃，抗跌能力提升 30 倍，耐刮能力增加 16 倍；內螢幕就用咗超韌多重複合疊層，抗衝擊能力提升 200%。新機仲首次喺三折疊機種加入 IP58/59 防塵防水能力，內置電池容量亦增加到 6000mAh 以上。

自家設計新晶片

硬件配置方面，新機全系列搭載 Kirin 9050 Pro 晶片。今次係 HUAWEI 繼 Mate 40 系列全球發佈會相隔六年之後，再一次喺大型發佈會詳細講解全新 Kirin 晶片。Kirin 9050 Pro 採用「邏輯折疊 Logic Folding」技術，將晶片入面嘅邏輯單元分層堆疊，透過垂直通道傳輸訊號，縮短咗傳輸距離並減低延遲。運算單元包含靈犀 CPU、馬良 GPU 同達芬奇架構 NPU，配合新發表嘅 HarmonyOS 7 系統，喺軟硬件協同運作之下，整體效能比起上一代提升咗 42%。

設計部份

外觀方面，新機提供皓白、錦紫、玄黑三款機身顏色，機背用咗織金雲錦工藝重現絲織質感，鏡頭邊框採用釔晶寶石製成嘅星鑽設計，經過 8 道工序打磨出 33 個切面，機身腰線亦首次印上 ULTIMATE DESIGN 標誌。另外，螢幕加入「靈盾防窺屏」技術，利用獨立雙像素設計提供硬件層面嘅防窺效果，用家可以撳外螢幕或者智控鍵啟動，又或者將手機單邊翻折作物理防窺。

影像部份

拍攝規格方面，Mate XT 2 配備第三代紅楓原色鏡頭，透過新濾光鏡片過濾紅外雜光，感光元件進光量提升 96%，色彩還原表現比起 Mate XTs 提升 95%。主鏡頭採用 5,000 萬像素 RYYB 感光元件（1/1.28 吋），具備 F1.49 至 F4.0 連續可變光圈；超廣角鏡頭為 4,000 萬像素 RYYB 感光元件，長焦鏡頭就配備 5,000 萬像素 RYYB F2.2 大光圈潛望式結構。

售價部份

售價方面，16GB + 256GB 定價 19,999 元人民幣，16GB + 512GB 定價 21999 元人民幣，16GB + 1TB 定價 23,999 元人民幣，而 16GB + 1TB 靈盾防窺屏版就賣 24999 元人民幣，預計喺 9 月 13 日喺中國市場正式開售。另外仲有一款 16GB + 2TB 靈盾防窺屏版手寫筆套裝，定價 29,999 元人民幣，會喺 9 月 23 日開賣。配件方面，HUAWEI M-Pen 3 Mini 套裝定價 1199 元人民幣，旋轉支架保護殼就定價 499 元人民幣。