輕量版走廣告計劃 YouTube Premium Lite 香港上架！即睇收費 + 數五款手機可免費使用最多六個月-ePrice.HK

YouTube Premium Lite 個人計劃

YouTube 正式喺香港推出 YouTube Premium Lite 個人計劃，月費定為 HK$48，並且設有第一個月 HK$0 免費試用優惠。對比返目前香港個人版 YouTube Premium 每月 HK$88 嘅收費，呢個 Lite 版本足足平咗 45%，令到想安靜睇片嘅朋友可以用低唔少嘅成本入場。留意嘅係，大家千萬不要在 iPhone 入面課金，因為要付「蘋果稅」乜都貴晒。

▲ YouTube Premium Lite 香港收費

Lite 版有乜嘢少咗

到底 YouTube Premium Lite 同平時用開嘅 YouTube Premium 有乜嘢分別？從規格可見，Lite 計劃主要包咗三大基本功能：大部分常規影片免廣告播放、大部分影片背景播放，以及下載影片作離線觀賞。不過用家要留意，Lite 版係唔包 YouTube Music 嘅免廣告音樂串流服務。條款入面亦特別列明，Lite 嘅免廣告福利主要適用喺大部分非音樂影片，但唔包括 YouTube Shorts 短片；另外當大家喺 App 入面做搜尋或者瀏覽推薦頁面嗰陣，介面依然有可能見到廣告。同時，官方音樂 MV 或者涉及音樂版權嘅創作影片，亦都唔屬於 Lite 嘅免廣告範圍。

收費比較

回顧現時香港 YouTube 嘅完整收費架構，個人版月費係 HK$88；專為兩個人而設嘅雙人計劃月費為 HK$128；可以畀最多 5 位家庭成員共用嘅 Family 家庭計劃月費係 HK$208；而大專學生計劃月費就係 HK$58。對比之下，今次開價 HK$48 嘅 Premium Lite，成為咗成個收費表入面除咗學生特惠之外最平嘅個人訂閱選擇。

▲ YouTube Premium 其他收費

有乜注意

除咗直接畀錢訂閱，今次服務仲牽涉到 Google 嘅雲端生態。現時訂閱 Google AI Pro 嘅付費用家，帳戶入面其實已經包埋個人版 YouTube Premium Lite，唔需要額外再畀月費。不過大家要注意，呢項福利只係適用喺申請嗰位主帳號或者家庭群組嘅管理員本人，家庭方案入面嘅其他成員係冇得共享呢個免廣告特權。

有乜優惠

另外喺手機買機優惠方面，如果近期換機亦有機會直接受惠。Samsung 喺 2026 年推出嘅三款摺機，包括 Galaxy Z Fold8、 Z Flip8 及 Z Fold8 Ultra，買機用家都可以獲得半年 Google AI Pro 服務 （要自行登記) ；POCO 旗下 POCO F9 Ultra 及 POCO F9 送三個月 Google AI Pro。換句話講，呢批摺機同指定 POCO 手機嘅新用家，只要啟用咗相關優惠，就可以順便享有埋隨附嘅 YouTube Premium Lite 福利，慳返一筆影音訂閱開支。而 POCO 兩款手機同時送了三個 Youtube Premium ，所以最好分開申請，先用 AI Pro 再用 YT Premium 就唔會浪費啦。
 

最新新聞