- HONOR Magic V6 超薄大摺實測
分區列表
左定坤 (Cho Ting Kwan) 2026-06-30 14:29 | 網絡消息
七大營辦商資訊一網打盡 數據直接來自政府
hkbustime.com 喺 2026 年 6 月 29 日正式推出，整合香港政府 data.gov.hk 嘅公共運輸開放數據，喺同一個畫面合併顯示九巴、龍運、城巴、新巴、新大嶼山巴士、港鐵巴士同輕鐵，共七個營辦商嘅預計到站時間。每條路線最多顯示未來三班車幾分鐘到，畫面每約 20 秒自動更新一次，介面係仿照九巴智能站柱嘅紅色大字設計，一眼就睇得清清楚楚。
舊手機唔洗丟 變身枱頭智能站柱
hkbustime.com 最大特色，係可以將一部閒置舊手機或平板「翻生」，變成專屬嘅巴士到站顯示屏。做法好簡單：搵個手機架擺好，插上電，個畫面已經設定好唔會自動熄屏，可以長期常開。用瀏覽器嘅「加入主畫面」功能，仲可以以全螢幕模式運行，效果就好似真正嘅智能站柱咁。用 Google 帳戶登入之後，設定好預設車站，網站就會記住你嘅偏好，下次打開即刻顯示該站到站時間，唔使每次重新搜尋。用戶仲可以同時加埋最多 10 個車站，所有結果會按最快到站時間排序，方便比較唔同路線。
車費同到站狀態提示 貼心又實用
服務喺路線號碼旁邊仲會顯示由該站上車嘅成人車費，已經按分段收費計算，但唔包括八達通優惠、長者及小童半價，以及 $2 樂悠咭計劃折扣。新大嶼山巴士更加會喺星期日同公眾假期自動切換到假日票價。到站狀態用淺白廣東話表達：快到嘅顯示「就到啦」（紅色），剛開走嘅則顯示「走咗啦」（灰色置頂），一眼就知夠唔夠時間衝落去。
hkbustime.com 完全免費，係漸進式網頁應用（PWA），純前端設計，直接連接政府開放數據，唔設自建後端追蹤，用戶設定只儲存喺自己嘅裝置度，私隱有保障。服務仲特別兼容 iOS 12 等舊款裝置，確保長者家庭嘅舊手機都用得。市民而家可以喺電腦或手機瀏覽器前往 https://hkbustime.com 免費使用，詳細教學見 https://hkbustime.com/guide。