五舊水 Android OS 無 GMS！HMD Asha 305 Lite 用嚟上 ChatGPT 勁抵玩-ePrice.HK

Android Go 系統

HMD 最近喺菲律賓開賣入門級 Android 手機 HMD Asha 305。呢部機專門針對入門市場，用上咗輕量化嘅系統，畀用家可以有一部實用嘅手機去處理日常通訊。HMD Asha 305 採用咗 5 吋 FWVGA IPS 螢幕，機身尺寸大約係 147.0 × 71.5 × 10.2mm。核心硬體方面，手機採用咗四核心處理器，有 2GB 同 3GB RAM 兩個版本揀，儲存空間分別係 16GB 或者 32GB，仲支援 microSD 卡擴充，應付平時用嚟聯絡或者簡單瀏覽都夠用。

兼容百款 Apps

因為真係好低配，佢採用嘅係 Android 14 Go 版本，係專為超入門手機而設嘅手機 OS。不過，佢無內置 GMS，即係 Google 服務，問題係好多 App 可能會因為缺少 GMS 支援而出現問題。不過，HMD 自己寫明支援超過 100 個應用程式，當中有晒各大 Social Media 嘅 Logo，同埋 ChatGPT。即係一部五百蚊左右嘅手機，都可以用到 ChatGPT。

相機方面，HMD Asha 305 配備後置 500 萬像素雙鏡頭，前置鏡頭就係 200 萬像素。最特別嘅係，佢內置咗 2,500mAh 可拆式電池，而家市場上已經好少見到呢類設計，對有需要更換電池嘅用家嚟講會方便好多。連接方面，部機支援 4G LTE、VoLTE 同埋雙 nano-SIM 卡槽。充電同傳輸就用 USB Type-C，仲好貼心咁保留咗 3.5mm 耳機孔。
 

賣價

HMD Asha 305 已經喺 2026 年 7 月於東南亞市場開賣。以菲律賓定價為例，2GB / 16GB 版本售價大約係 3,990 PHP（折合約 500 港元）。呢部機主打入門市場，對想用簡單智能手機嘅人嚟講係一個唔錯嘅選擇，尤其係鍾意可拆式電池設計嘅用家。

來源: Shopee 

最新新聞