- 7 款大電池手機推介
分區列表
左定坤 (Cho Ting Kwan) 2026-07-17 16:39 | 網絡消息
政策起風波： SMS 、通話紀錄無一幸免
Google 已經開始向用家發信，預告呢個新政策。喺以前， Google 除咗 Google Photos 嘅相片影片同埋 MMS 入面嘅多媒體附件會計落 15 GB 免費容量之外，其他手機備份一律豁免收費。但係由而家開始，大家要打醒十二分精神，因為新政策規定，所有 Android 備份數據都會一律計入 Google 帳號嘅儲存空間。以下呢幾樣嘢，以後全部都要計數：
● SMS 手機短訊（成個 SMS 文字內容）
● 通話紀錄（邊個打畀你、你打畀邊個）
● 手機系統設定（好似 Wi-Fi 密碼、 Wallpaper 牆紙、手寫輸入法設定等）
● 各個 App 嘅內部數據同設定
簡單嚟講，你部 Android 手機嘅 backup ，以後要同你嘅 Gmail 郵件、 Google Drive 檔案以及 Google Photos 相簿，一齊瓜分個 15 GB 免費空間。
`▲ 用家開始收到 Google 溫馨提示電郵。
雲端空間隨時乾塘
面對今次收緊政策，用家們又唔使自己嚇自己先。雖然純文字同系統設定嘅檔案容量普遍好細，但如果用家本身個雲端空間已經用到，一旦儲存空間不幸爆棚，系統就會自動停用備份功能。到時你部手機有咩冬瓜豆腐，資料就真係救唔返。而且空間爆咗，隨時連 Gmail 都收唔到信，手尾非常長Google 會慢慢推播警告通知，每個人會有 45 日嘅緩衝期。收到信之後，大家就要乖乖地動手清理，唔好拖到最後一刻先嚟後悔！
Android 9 或以上救星：自選備份功能正式登場好在 Google 今次都算留有一手，喺收緊政策嘅同時，亦都幫 Android 9 或以上系統嘅手機加入咗更加精細嘅備份開關控制。以前一撳 Backup 就會全包宴幫你備份晒所有嘢，而家你入到設定，可以好似點心紙咁逐樣剔。如果你覺得通話紀錄同 SMS 唔重要，大可以熄咗佢哋嘅備份，淨係留返最緊要嘅 App 數據同手機設定。不過大家要留意，如果熄咗備份，第時換新手機或者部機要 Factory Reset 嗰陣，呢啲無備份嘅 SMS 同 Call History 就會「一去不返」。所以點樣設定，真係要自己權衡輕重，唔好因小失大。
三招自救指南
唔想臨急抱佛腳、等到空間爆咗先嚟救亡？即睇以下三招自救方法：
● 善用 Google One 儲存空間管理工具（ Google One Storage Manager ）
入去呢個工具，佢會幫你自動搵出 Gmail 入面好大嚿嘅 Attachment 、垃圾桶未清嘅大檔案，仲有 Google Photos 入面影到模糊嘅相片，畀你一鍵清走。
● 熄咗啲無用 App 嘅備份
去手機「設定」>「帳號與備份」>「 Google 備份」入面，睇下有咩第三方 App 係無必要備份嘅，手動熄咗佢，慳得一格得一格。
● 付費買空間，買個安心
如果清理完都係唔夠用，而你又唔想煩，最簡單就係「用錢解決問題」。升級去 Google One 計劃，例如最基本 100 GB 空間，咁就唔使成日提心吊膽驚爆空間啦。