左定坤 (Cho Ting Kwan) 2026-07-31 14:32 | Hkbn
Global SIM+ 套裝
香港寬頻 HKBN 嘅 Global SIM+ 係月費以外嘅額外 SIM 卡，只提供漫遊 Data。你可以去 HKBN 買定先，去到目的地自動漫遊上網。每日 1GB 全速數據，之後限速 128kbps 無限上網。HKBN 官網入面有不少預繳 Bundle，最近力推叫「Global SIM+ 熱門亞太超筍優惠」套餐。呢個 Package 包咗一張漫遊 SIM 卡，同十日熱門亞太地區上網數據。覆蓋地區包括中國內地、日本、南韓、台灣、澳門、新加坡、馬來西亞、泰國、越南、菲律賓、印尼、柬埔寨、印度及澳洲。賣價 $99，平均嚟講 $9.9 一日，喺呢類限速 day pass 漫遊嚟講，叫做比較抵嘅一款。一日 1GB，只要唔係瘋狂睇片，應該夠晒用。呢十日可以分開嚟用，只要開啟後 365 日內用晒佢就得。
免費旅遊保險內容
今次 HKBN 更加送埋 1 年免費旅遊保險。以 $99 包一年免費旅遊保險，係有啲匪夷所思，但一分錢一分貨，呢個咁低嘅保費，保額都唔會高。版主睇過 Terms，主要承保範圍包括海外意外住院醫療，每次最高十萬；人身意外，包括意外死亡、永久完全傷殘，都有 up to 十萬嘅保額。行李及個人財物都有得保，但要 25% 自負額。而手提電腦、平板電腦、手提電話、手提箱、大衣箱、容器或類似物件就唔包，另外，航班 delay 亦無包。而呢張保單係由 AXA 安盛承保。簡單嚟講，係一份好入門級嘅旅遊保險，你當送嘅，或者平平地，用咗先都可以。記得，旅遊保險係要獨立申請嘅。