近年旗艦手機嘅相機愈做愈強，但鏡頭凸起亦愈來愈誇張，放喺枱面使用時搖下搖下，相信大家都已經習慣。不過，Samsung 下一代旗艦 Galaxy S27 Ultra，可能會透過一項聽落相當特別嘅「噴墨鏡片」技術，將相機模組進一步收薄。到底係乜嘢玩法？睇下文啦！
三組後置相機齊用噴墨製程
據韓國產業消息透露，Samsung Electronics 以及 Samsung Electro-Mechanics 正為 Galaxy S27 系列開發新一代鏡頭模組，並計劃將噴墨印刷（Inkjet Printing）製程，更廣泛應用於 Galaxy S27 Ultra 三組後置相機之上。
其實 Samsung 已經率先在 Galaxy S26 Ultra 部分鏡頭採用相關技術，今次則有望擴展至 L3 Tele、L3 Wide 及 L6 Wide 等指定鏡片層。不過要留意，並唔係成組鏡頭入面每一片鏡片都轉用噴墨製程，而係每個模組只有其中一層使用霧面油墨，其餘鏡片仍然保留傳統遮光薄膜，以平衡成本、良率以及耐用性。
唔係用打印機幫鏡頭上色
所謂噴墨鏡片，並唔係直接將墨水噴落鏡頭中央，而係在鏡片外圍嘅接合位置，精準塗上一層霧面油墨。
當光線由不同角度進入鏡頭，部分雜光可能會在鏡片內部反射，形成耀光或者鬼影。傳統做法係貼上抗反射遮光薄膜，而新製程就改用噴墨方式塗上霧面油墨，同樣可以阻隔雜光之餘，佔用嘅空間亦更少。
換句話說，呢項技術嘅最大賣點未必係令相片質素一夜之間大幅提升，而係可以縮短鏡片之間嘅距離，令相機模組做得更薄，同時增加光學設計嘅彈性。如果最終能夠減少相機凸起，又唔影響成像質素，對用家而言已經係相當實際嘅改進。
Ultra 相機仲可能由四鏡變三鏡
另一邊廂，Galaxy S27 Ultra 嘅相機數量亦可能出現重大改動。韓國《電子新聞》表示，Samsung 計劃將 Galaxy S27 系列統一為三後置鏡頭配置，當中 Ultra 型號可能會取消沿用多代嘅 1,000 萬像素 3 倍長焦鏡頭。
傳聞 Galaxy S27 Ultra 將保留 2 億像素主鏡頭、5,000 萬像素超廣角鏡頭，以及 5,000 萬像素 5 倍潛望式長焦鏡頭。至於新加入嘅 Galaxy S27 Pro，則可能採用 2 億像素主鏡頭、5,000 萬像素超廣角，加上 1,200 萬像素 3 倍長焦鏡頭。
版主覺得，相機模組變薄當然係好事，但如果代價係直接刪走一支 3 倍長焦鏡頭，Samsung 就要證明主鏡頭裁切以及運算攝影，真係能夠補回 2 倍至 5 倍之間嘅焦段。否則「四鏡變三鏡」，好容易會被用家視為減配，而唔係升級。
Galaxy S27 系列預計要到 2027 年先正式登場，目前所有規格仍然只屬產業消息，最終配置隨時有變。如果畀你揀，你會想要更薄嘅相機模組，定係寧願保留四鏡頭配置呢？
來源：GizmoChina