左定坤 (Cho Ting Kwan) 2026-09-12 21:00 | Apple
內地朋友首日取機 手機舖加價千元收
至於香港最終有冇得炒，暫時仲未有答案。不過版主今次就收到一個來自內地嘅獨家消息，版主嘅內地朋友成功搶到 512GB 紅色 iPhone 18 Pro Max，並將會於首日直接到 Apple Store 取機。
據佢表示，內地手機舖已經願意以高於成本約 $1000 人民幣嘅價錢收機。雖然 $1,000 唔算係非常誇張嘅炒價，但至少證明內地市場暫時真係有人願意為現貨及指定顏色加錢。
細容量及新色需求最強
對於唔想等貨、又指定要紅色 512GB 嘅買家，加價買機可能仍然可以接受。不過由今次搶購情況睇，市場需求主要集中喺 256GB、512GB 及新色，2TB 版本反而相對容易買到，最大原因應該係售價太高。
版主今次亦試過由揀容量一路撳到付款位置，最後先顯示「沒有提供」，反映部分型號並唔係一開始就顯示缺貨，而係去到落單最後一步先知道無貨。
香港會唔會跟住炒？暫時未敢講
不過要留意，以上只係版主向內地朋友了解所得嘅個案，未能代表整個市場行情。香港會唔會出現同樣情況，仍然要睇 Apple 補貨速度、電訊商供應，以及首批貨源有幾多。
「難搶」唔等於一定「有得炒」。當 Apple 後續補貨，或者授權零售商陸續有現貨，最初嘅炒價隨時會快速收窄。再加上平台費、交通、資金成本及保養問題，最後可能只係賺少少，甚至要蝕讓出貨。
版主覺得，今次最有機會出現短期炒價嘅，應該係 256GB 或 512GB 新色，但內地已有 $1,000 加價收機，並唔代表香港一定可以複製同樣行情。大家成功搶到未？又會唔會考慮放出去試下炒價呢？