free hit counter script

效力23年蕭徽勇不獲無綫續約離巢 配音員又少一個:一啲人情味都冇

26
蕭徽勇
蕭徽勇

唔少動畫及外購劇喺TVB播出時都會由專業配音員為角色配音,一班專業配音員配過好多經典角色,陪伴香港人成長。繼早前「靜香」梁少霞、「小丸子」鄭麗麗、「小夫」林丹鳳及「港版吳謹言」何璐怡等11位配音員離職後,再有配音員不獲TVB續約宣布離巢,最新就係曾擔任演員嘅「Gordon哥哥」蕭徽勇。

現年45歲嘅蕭徽勇,喺澳州留學後返港便參加第17期藝員訓練班,加入TVB後由跑龍套開始做起,默默耕耘嘅佢慢慢做到配角,演技備受觀眾肯定。另外,佢亦有做過兒童節目《放學ICU》主持,及喺2008年開始兼職做TVB配音員,真係周身刀張張利。噚晚(11日),佢喺社交網站上載一張黑白色嘅TV Buddy照片,並寫上:「自2001年3月入讀第17期藝員訓練班便開始了差不多23年的夢幻之旅。高低起跌甜酸苦辣,真係由頭到尾都咁好味。 多謝電視廣播有限公司的養育之恩。感激我遇見的所有經歷與及人和事。 永不抱怨,從不後悔,積極迎接將來更多新挑戰。 #演員 #配音員 #大會司儀 #帶貨Gor #蕭徽勇Gordon哥哥」

唔少網民知道蕭徽勇離巢消息後,紛紛留言為佢打氣,例如「Gordon哥哥加油,繼續努力,未來發展一切順利!祝福你」、「oh no,咁我真係連開電視的動力都冇.不過都祝福你」、「祝你前程錦繡!」、「加油!」、「祝新一切順利 加油」、「希望你會出嚟繼續做自由身配音員」、「雖然係配角。 但對你演出好有印象。 努力」及「Gordon哥哥你係難得嘅人材,無論如何都祝福你一切順利有美好新開始,繼續努力加油呀!」等等。

而蕭徽勇喺接受傳媒訪問時,佢就話喺兩年前因Cut騷嘅關係,佢自己選擇唔簽演員約,當時嘅佢感到非常唔捨得,後來就轉簽配音員約,啱啱就完成咗兩年合約,不獲續約。而佢有份參演嘅電影《爆裂點》及《金手指》上畫,所以佢覺得係一個幾好嘅時機。另外,佢仲話近年嘅工作量唔多,就算留低都可能只有底薪,好彩佢喺四年前開始做的士司機,對生計影響唔大;而之後佢亦會喺其他頻道參與幕前及幕後配音工作,至於TVB嘅報幕工作,如果有需要,佢都會以自由身身份去參與。另外,佢仲話只係收到一封俗稱「Thank You Letter」嘅通知,合約嘅事宜傾都冇傾過,做咗23年講聲都冇,雖然行政上係冇錯,不過佢就感到唔尊重及失望,因為一啲人情味都冇。

蕭徽勇

蕭徽勇

蕭徽勇

蕭徽勇

蕭徽勇

蕭徽勇

蕭徽勇

蕭徽勇

蕭徽勇

蕭徽勇

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!

Comments are closed.