【明報專訊】佘詩曼主演無綫台慶劇《新聞女王²》昨晚香港首播，昨午聯同黃宗澤、高海寧、夏文汐和譚俊彥等盛裝出席在中環的銀行總行舉行的記者會造勢，佘詩曼與黃宗澤首次演對手戲感覺新鮮，戲裏戲外不停鬥嘴，讚好玩過癮有火花，嫌未夠喉，期望開拍第3輯繼續鬥。夏文汐相隔8年再拍無綫劇，認為講緣分，劇中演佘詩曼養母，自詡比Man姐更Man姐。
記者：林祖傑
佘詩曼（阿佘）、黃宗澤、夏文汐、譚俊彥、高海寧、王敏奕和陳曉華等《新聞女王²》台前幕後昨日出席記者會，一眾女星悉心打扮，陳曉華大騷長腿搶鏡。無綫行政主席許濤主持祝酒儀式，預祝劇集創佳績。佘詩曼和黃宗澤多年來只合演過2006年古裝劇《覆雨翻雲》，還要沒有對手戲，今次終有機會再同劇，連場對手戲，黃宗澤說：「入行廿幾年，未試過和阿佘拍劇有對手戲，當時只有同場出現，連一句對白都冇，今次過足癮，咁多年差不多成個TVB的演員都合作過，只有阿佘未真正合作，好開心，件事好新鮮。」
即興「爆肚」改對白
黃宗澤表示今次也有親自煲靚湯慰勞劇組，不過佘詩曼投訴飲得一次又無湯料，經常被對方以「殺人的眼神」望住，「因為同步分兩組拍，經常見不到她，都隔得遠，若不太遠我會送埋過去，點敢hea佢，飲時還投訴話冇料，都未飲完已經鬧，啲花膠響底呀！」
佘詩曼稱拍攝時經常被黃宗澤毒舌揶揄，黃宗澤解釋：「我都係收order做嘢，因為監製鍾澍佳話我喺呢套劇最大功能係激幾個女人，邊個夠膽激阿佘吖？估不到我都好成功。」佘詩曼稱覺得今次好好玩，因為經常和黃宗澤在不影響拍攝情况下「爆肚」改對白，「尤其係寸來寸去嗰part，因為冇人比我們更清楚角色當刻想講什麼，所以係有花火」。
化身《東張》主播 佘詩曼嗌好玩
經過今次想不想再次合作？黃宗澤即道：「想，真係好玩，如果可以多一些鬥嘴戲，仲過癮啲，看看《新聞女王3》會不會有機會啦。」佘詩曼亦說：「真係唔夠喉！」對於前日化身「東張女神」上《東張西望》與黃宗澤做主播唇槍舌劍，她說：「係幾好玩，因為做live，只試過選完港姐為慈善騷做過live主持，當時嚇到我死，壓力大到直接瘦5磅，做完即刻同經理人講以後唔做主持，所以之後都冇做過。」黃宗澤強調只是上去玩，宣傳劇集，相信觀眾很理解他們不是專業主持，「我一窒佢就鬧我，心諗有冇搞錯，佢鬧上癮」。
高海寧收起性感演官員
譚俊彥與夏文汐繼電影《出軌的女人》，相隔多年再合作，今次譚俊彥扮演夏文汐的司機。問夏文汐為何自劇集《逆緣》後相隔8年才回無綫拍劇，她說：「有時拍劇要講緣分，我都想拍多啲，不過啱我先會拍，今次撞啱我剛巧從美國回來，角色又是從美國回來，比Man姐更Man姐，因為我演Man姐養母，佢咁霸氣都係我訓練出來，是同一類人。」
高海寧昨日打扮密實，表示今次劇中演政府官員，「所以造型大方得體同有型，今輯也不會如上輯般有性感畫面」。有指劇中飾演她老公的林正峰被消失，高海寧說：「今次很少講愛情，劇情話佢去了美國工作，大家可以睇吓就知有冇。」
Comments are closed, but trackbacks and pingbacks are open.