李龍基自嘲是豬 拒認遭情騙 倘王青霞離婚 不排除再續前緣 – 20260113 – 娛樂

李龍基聞Chris已婚育子 大受打擊 自嘲「一隻豬」：滿懷失望

記者：林祖傑

攝影：鍾偉茵

李龍基昨日到觀塘接受網台訪問，早前承認跟未婚妻王青霞分手，失戀後首亮相的他表示已放下了很多，人始終要接受現實，不過夜闌人靜時，難免想起不少往事，「為了她，我在珠海租屋，簽了兩年約，組織了一個家庭，一起生活了兩個多月，怎料我去完美國回來，已人去樓空。王青霞稱父母希望她幫手打理生意，現在我一個星期回去一兩日」。

李龍基說有人形容他淫人妻女，是很大指控，強調去年冬至，和大眾一樣，當時才知道王青霞未離婚，還有一個兒子，「我的打擊難以形容，想了很多，好憤怒，但諗深一層，她都有自己的難處，我知道她非常愛我，我亦非常愛她，所以她若講出來驚會同我散」。他表示王青霞已解釋為何冬至與老公食飯，不事先跟他講清楚，原因和老公已分開18年，雖未離婚，但一直沒有聯絡，只是對方仍在幫王父做生意，未認識李龍基前，已離開了老公到美國。

王青霞曾展示辦離婚文件

李龍基重提王青霞被入境署扣查，自爆他同時被捕，「我同王青霞一齊喺屋企畀人拉，我好記得是下晝兩點幾，返屋企冇耐，有人拍門，開門後四五個男士入嚟，表明身分係入境處。我一直簽保，簽咗兩年，每3個月簽保一次，後來王青霞被判入獄，因為搵唔到證據證明我教唆王青霞，亦搵唔到證據我係預早知情，兩年後釋放我，1000元擔保都攞番」。

李龍基認為跟王青霞都深愛對方，以為會有好結局，不過承認王青霞未離婚和他一起是欺騙，其間說跟他結婚，一直拖，又承諾一出獄便嫁他，「我曾滿懷希望，現在滿懷失望，佢係呃我，都有講會搞離婚，還給我看簽好的文件，但國內離婚好易，卻一直冇搞，所以便平靜分開。老實講，知道別人有老公卻繼續來往，我覺得有點不道德，若她真的離婚，我不反對有後着，大前提一定要單身，不可背着別人老婆個名同我一齊」。他不認同自己老貓燒鬚，強調不是情場殺手，「如果係，就唔會搞到今時今日呢個田地，我不認為王青霞是『情騙』，佢亦冇騙錢，花的都是我放在家中一萬幾千買餸錢」。

承認曾懷疑王青霞生過仔

李龍基直認和王青霞有親密關係時，曾一度懷疑對方生過仔，「因為生過小朋友的女士一定有少少唔同，總之我感覺到，但愛是盲目，鴕鳥心態，從來沒過問，驚一問衰咗就弊傢伙，直至被人挖出來，才如夢初醒」。問到是否依然心愛王青霞，視對方為「豬豬」？他說：「點會忽然間唔愛，佢已不是我的『豬豬』，是別人的『豬豬』，我才是豬，真的是一隻豬。」可會再尋覓另一春？李龍基稱世事多變，豈可像雲煙，此時此刻不會，明日就不知，「認識她之前，都認識好多後生女，有感覺真的不多，點知遇到這隻豬，真是天意！總之呢一刻我唔會再搵第二隻豬，現在疊埋心水『放飛機』，玩模型飛機減壓」。

■更多娛樂猛料 ﹕ol.mingpao.com

上 / 下一篇新聞