web counter

Apple Vision Pro 版主真實用感!超逼真,正到爆!立即預約親身體驗 好過聽人講!-ePrice.HK

Apple Vision Pro 版主真實用感!超逼真,正到爆!立即預約親身體驗 好過聽人講!-ePrice.HK
0
Apple Vision Pro 喺上星期五,即 6 月 28 日,正式喺香港開賣,而當日版主就一早去到尖沙咀 Apple Store 進行採訪,訪問第一位排隊以及第一位付款購買 Vision Pro 嘅顧客,並向佢哋了解試玩後感。而為咗更設身處地了解使用 Vision Pro 嘅流程,版主特地預約咗星期六中午時段,再親臨尖沙咀 Apple Store,親身體驗一下整個 Demo 流程。網上有好多人講到,又話點重,又話點唔成熟,但版主試完覺得,如果你對 Vision Pro 有任何疑惑,強烈建議大家預約親身去體驗,好過聽人講!不過,呢篇文章我都會分享一下我體驗後感,信不信由你!Let’s Go!

內文.jpg

立即預約親身體驗 好過聽人講

如果你有興趣想體驗一下 Apple Vision Pro 有幾正,強烈建議預約產品示範,好過成日聽人講呢樣唔好嗰樣唔好,又話點貴,Vision Pro 價錢唔平,但佢係有佢值得入手嘅地方,值呢個價,雖然我窮無錢買,但如果遲下 Apple 會有平民版,我應該都會忍唔住入坑!唔知點樣可以預約產品示範?可以撳呢條 Link,登入返你嘅 Apple ID,預約時間。

正式體驗前,職員協助一連串設定

而版主上星期六就親身去體驗過 Vision Pro,成個流程相當 smooth,首先一去到 Apple Store,坐低咗,為我進行示範嘅職員,就會拎起一部 iPhone,畀我掃描面部,就好似平時用 iPhone 設定 Face ID 咁。呢個步驟,係掃描咗你面型大細之後,方便決定 Vision Pro 遮光罩嘅尺寸。如果你本身有戴眼鏡,現場會有部儀器,可以幫你量度你鏡片嘅度數,然後職員就會即時砌返適合你使用嘅 Vision Pro。等待 Vision Pro 送達嘅過程,大約需時 5 分鐘左右。

螢幕截圖 2024-07-02 下午3.22.44.png

而喺等待嘅過程中,職員就會趁呢個空檔,同你粗略講解 Vision Pro 嘅操作方法,例如會教你基本手勢,例如用手指公同食指互點一下,就相當於平時你用電腦 left click 咁,另外亦會教你如果想縮放相片,或者將瀏覽器視窗拉上拉下,應該用咩嘢手勢。

大概等咗 5 分鐘,專為你而設定嘅 Vision Pro,就會送到你手上,職員會教你點樣拎起 Vision Pro:左手呈 C 字形拿着 Vision Pro 前方,而右手則用來調校鬆緊。職員表示,Vision Pro 滿電時大約可以用到 2 小時,所以整個示範過程入面,佢哋都會將 Vision Pro 連接專屬尿袋,避免會無電。而戴上 Vision Pro 之後,會先同你進行手部設定以及眼球追蹤嘅校對,一共有 19 個點進行設定,只要用眼球望向嗰啲點,利用手指公同食指 click 一 click,就搞掂。

螢幕截圖 2024-07-02 下午3.21.25.png

正式使用 Vision Pro 第一身體驗

正式使用 Vision Pro!Apple Store 職員已經為大家準備咗一系列嘅材料,等大家去體驗,例如睇相、使用 Safari、AR 應用等等。

一開始係利用 Vision Pro 觀看相片,一開始你可能唔覺得有乜嘢 feel,到之後有兩張全景相片,開始令我有啲感覺,好逼真,好似親歷其境嘅感覺咁,當然去到呢個 moment,都未令我有 wow 一聲嘅感覺,因為幾逼真都好,始終其實佢只係感覺好似一個好大、好長嘅長方形,去睇一張全景相片。

第一個令我有 Wow 一聲嘅感覺,有感動嘅,係用 Vision Pro 去睇 Immersive Photos / Video,目前呢種嘅影片只能透過 Vision Pro 嘅相機影到,你可以想像一下,你有個小朋友,啱啱過生日,你用 Vision Pro 錄低整個過程,到你用 Vision Pro 睇返,成個感覺係相當立體,好似你而家就返番去過生日嗰個 moment,同緊個小朋友吹蠟燭咁。

第二個令我有 Wow 一聲感覺,係睇戲嘅時候,Apple Store 喺現場準備咗兩條喺 Apple TV 上架嘅影片,畀大家欣賞,第一條係 Mario 大電影 Trailer,呢個感覺唔太強烈,因為感覺就係好似去咗戲院睇戲咁,只不過呢個係你專屬嘅私人影院,你鍾意喺屋企隨時隨地都睇到。但第二條片係 Apple 製作嘅沉浸式影片,當你播放影片並轉動 Vision Pro 左上方嘅數碼旋鈕,就可以將畫面變成沉浸式,360 度無縫顯示,真真正正有一種親歷其境嘅感覺,版主睇緊嘅過程中,都不禁會心微笑,例如用嚟睇球賽,你會感受到嗰份現場感,相當刺激;球員贏波開心到齊齊彈起,你嘅視角就好似喺呢球球員隔離,感受到嗰份興奮感。而呢種感覺,令我覺得相當正,好逼真!你睇版主睇到幾開心~:

螢幕截圖 2024-07-02 下午3.24.51.png

試用完 Vision Pro,我覺得相當震撼,但當然仍有美中不足之處。震撼地方除咗在於好逼真、真實,而且戴完係唔會有任何頭暈等不適感覺,而沉浸式嘅視角體驗,更是令我 Wow 一聲嘅衝動。但數到缺點,也是因為呢個沉浸式觀看體驗太正,可惜暫時唔係所有應用、影片,都做到沉浸式觀看體驗,而我比較期待嘅,係如果玩遊戲例如賽車 Game,都可以做到呢種 360 度現場感,真真正正嘅沉浸體驗,再可以配合埋軚盤嘅外置配件,擰個頭可以見埋倒後鏡,咁應該會係呢類頭戴裝置其中一個終極目標,當然呢啲都需要遊戲廠商積極配合,製作專為 Vision Pro 而設嘅沉浸式遊戲吧!

以下版主亦都錄低咗由我坐低、職員講解、設定、試玩嘅整個流程,同大家分享一下我整個過程嘅體驗,你哋都快啲預約親身體驗一下啦!


 

Leave A Reply

Your email address will not be published.