內地坐的士更方便！WeChat Pay HK 開放轉賬至個人小商戶，唔洗用人民幣付款-ePrice.HK

相信唔少香港人同版主一樣，都不時中意返大陸消費，好過成日困喺香港咁悶。返大陸，以前我成日鍾意叫滴滴快車，或者直接截的士，因為大陸坐的士相比香港嚟講，真係平好多。但唔知大家有無遇過一個問題，就係好多時的士司機淨係得微信支付，但問題如果你係用 WeChat Pay HK，你係過唔到數畀對方，好大可能係因為對方係個人戶口，而以前 WeChat Pay HK 淨係支持向商業戶口轉錢。不過，WeChat Pay HK 而家終於有解決方案！睇下文啦！

WeChat Pay HK 宣佈即日起擴大其跨境支付覆蓋至內地個人小商戶，包括深圳的士。港人於內地小攤檔品嚐當地美食、逛花市辦年貨、乘搭深圳的士等，均可用港幣付款，WeChat Pay HK 會自動將人民幣交易轉為港幣結算，而且不收手續費。WeChat Pay HK 已為內地近 50 個城市提供全面的交通工具電子支付服務，不但支援當地多種公共交通工具，還連接深圳地鐵、滴滴出行、高德地圖等熱門出行小程式，讓香港人在大灣區旅遊公幹暢通無阻。

對於今次 WeChat Pay HK 開放轉帳至個人小商戶呢個措施，網友又覺得係唔係更方便，係一個好消息呢？對我嚟講確係方便好多，至少唔使再特登為咗搭的士，走去開個大陸銀行戶口 (雖然我已經開咗)。你又點睇呢？

P.S. 順帶一提，除咗搭的士之外，行夜市去小店付款至個人商戶，都一樣可以轉到，相當方便！

============================================

大家都知 ePrice HK Facebook 暫時未能重啟，不過我們最近重新啟動 @eprice_hk Instagram 以及 Threads 帳號！有帳號的，希望大家都可以支持一下啦！

Instagram：@eprice_hk
Threads：@eprice_hk
YouTube：@ePriceHK-mobile