小米聖誕嘉年華開鑼！新耳機 $139起、手機劈價兼贈品送不停，一文睇盡2025年終掃貨全攻略！-ePrice.HK

平玩 ANC 耳機、磁吸「尿袋」登場

今年聖誕，小米有幾款新產品打頭陣。最平嘅係全新 REDMI Buds 8 Lite 真無線耳機，建議零售價只係 $139。佢主打 42dB 混合式主動降噪 (ANC)，對於呢個價位嘅耳機嚟講相當難得，內置 12.4mm 動圈單元，仲可以透過小米耳機 App 自訂 EQ 音效。耳機單次續航 8 小時，配合充電盒可使用 36 小時，而且充電 10 分鐘就可以聽足 2 小時，提供海浪藍、迷霧黑同雲棉白三色，12 月 9 號起正式發售。

另一實用新品係 Xiaomi 纖薄磁吸行動電源 (5,000mAh, 15W)，賣 $329。佢最大賣點係超薄機身，只有 6mm 厚同 98g 重，方便攜帶上飛機。支援最大 15W 磁吸無線充電，同時提供 22.5W 有線快充，可以為 iPhone 或具備磁吸功能嘅 Android 手機，方便地補充電力，即日起已經有售。

對於需要大掃除迎新年嘅朋友，可以留意 12 月 23 日 上市嘅 Xiaomi 無線吸塵器 G30 Max，建議零售價 $2,499。佢擁有強勁 280AW 吸力，配備智能灰塵偵測同多款清潔配件，電池容量達 4,000mAh，適合大單位使用。

手機平板折扣：旗艦減 $1500，入門機低見 $999

今次聖誕優惠，手機同平板係重頭戲，多款型號直接減價，部份仲有豐富贈品。

旗艦級選擇方面，Xiaomi 15 系列減幅最大。 Xiaomi 15 (12+512GB) 由原價 $5,999 減至 $4,499，直減 $1,500；細容量嘅 12+256GB 版本亦由 $5,499 減至 $3,999。

中階性價比之選，可以留意 REDMI Note 14 系列。頂配型號 Redmi Note 14 Pro+ 5G (12+512GB) 減至 $2,499。而 Redmi Note 14 5G 嘅 8+256GB 版本則減至 $1,499，最入門嘅 6+128GB 版本更只需要 $999，千元有找就有 5G 手機。

平板方面，優惠主要集中於贈品。例如購買 Xiaomi Pad 7 Pro (12+512GB) 會贈送價值 $799 嘅懸浮鍵盤；購買 Redmi Pad 2 Pro 5G 或 Redmi Pad 2 則會贈送原廠保護殼。

星級家電與掃貨攻略：領券、換購、搶紅包

除咗直接減價，今次嘉年華仲有好多額外著數。由即日起至 12 月 31 日，每日早上 10 點都可以用 Mi ID 喺小米官網 mi.com 領取現金券，包括滿 $1,000 減 $50、滿 $2,000 減 $100 同滿 $3,000 減 $200，適用於 POCO 手機及 AIoT 產品（新品除外）。

12月15 日晚上 8 點開始，更多精彩活動會接力登場。當日單筆消費滿 $1,225，即可以 $99 嘅優惠價換購 Xiaomi 手環 9 Active。同時，購買 POCO 或 REDMI Note 系列手機滿指定金額，有機會獲贈 $50 或 $100 超市禮券，名額每日有限。最震撼係全場顧客可以一齊瓜分總值 $200,000 嘅現金券紅包，人人有份，永不落空！