XPower 聖誕放大招！聯乘《咒術迴戰》、《龍珠》推潮玩充電神器，仲有一系列特色產品-ePrice.HK

動漫迷必搶！將人氣角色變成隨身充電裝備

今次 XPower 嘅攻勢，直頭係瞄準動漫迷嘅荷包。首先係熱爆嘅《咒術迴戰》，推出兩款好有心思嘅旅行充電器。其中一款「30W 4 輸出迷你 PD 快充」，以五條悟同夏油傑做設計，機身輕到只有 65 克，但就有齊兩個 Type-C 同兩個 USB-A 插口，可以同時為幾部裝置快充，帶出街絕對方便。

如果你需要更強勁電力，例如要為 MacBook 充電，咁就要留意「TA45B 6 輸出 45W GaN 旅行充電器」。呢款仲有虎杖、伏黑惠同兩面宿儺等角色款式選擇。最誇張係，佢除咗有 45W Type-C 輸出，機身側邊竟然內置咗一個萬用 AC 插蘇位，可以直插旅行風筒或者鬚刨，跟機仲送四款國際轉插，去旅行帶佢一個真係可能夠晒，慳返唔少行李空間。

至於《龍珠》粉絲，可以留意一下一條「8合1 100W充電線」。條線睇落好似好普通，但其實係個「充電 Hub」，線身有個盒仔，可以同時叉兩個 Type-C 同兩個 Lightning 裝置，總輸出達到 100W。即係話，你同幾個朋友出街食飯，帶呢條線就已經可以大家一齊叉電，仲要係行 PD 快充，唔使再爭插蘇位，設計的確幾聰明。

打造個性化桌面！屏幕鍵盤、電競滑鼠升級體驗

聖誕節除咗送禮，亦係升級自己「戰鬥裝備」嘅好時機。XPower 今次有幾款鍵盤相當搶鏡，特別係嗰款「Orcus 雙顯示屏機械鍵盤」。佢右上角有一塊細小嘅可觸控副屏幕，唔單止可以顯示時間、電量，最正係可以自訂顯示圖片或者GIF動畫，等你可以將最鍾意嘅動漫片段放喺鍵盤上，成個桌面即刻個人化晒。鍵盤本身支援熱插拔軸，你可以自己換唔同手感嘅機械軸，玩法好多元。

如果覺得副屏幕未夠誇張，仲有一款「Quaoar 鍵盤」直接整咗一面 8.5 吋嘅巨型 LED 點陣屏落去，可以自定顯示文字或者動畫燈效，夜晚熄燈打機，個氣氛肯定一流。至於想簡約啲嘅用家，佢哋都有矮身機械鍵盤同埋無線鍵鼠套裝選擇，照顧唔同需要。

居家旅行必備！從桌面到行李箱的「全場景」充電方案

而家人人手上都幾件電子產品，充電問題確實煩惱。XPower 顯然深明此道，推出嘅充電方案由你張書枱覆蓋到你去旅行。

想書枱乾淨整齊？可以考慮「RN105 塔式充電器」。佢將充電器做成直立式，最大賣點係內置咗兩條可以伸縮嘅 Type-C 充電線，用嘅時候拉出嚟，唔用就縮返入去，即時解決咗成枱都係線嘅亂況。而且頂部仲有兩個 Qi2 無線快充位，叉手機同耳機好方便。

需要極致大功率？旗艦型號「GW240 240W充電器」夠晒強悍，體積細細但有三個Type-C口，最高可以輸出140W，足夠同時為高性能筆記本電腦、平板同手機全速充電，一個取代所有原裝火牛。

講到去旅行，XPower嘅「PT200 200W旅行充電器」有成 8 個輸出插口，一個旅行團嘅叉電需求可能佢一個就搞掂。不過對於大多數人，可能同《ONE PIECE》或「罐頭豬LuLu」聯名嘅多功能旅行轉插更吸引。細細隻，但已經有快充插頭同萬能 AC 插蘇，去大部分國家帶佢就夠，非常實用。

實用又有趣！健康管理、按摩放鬆與創意小物

除咗主要嘅充電同鍵盤產品，XPower 仲有一系列幾得意嘅生活小物。例如同 Marvel 聯名嘅「智能脂肪秤」，可以連接 App 分析體脂率等幾十項數據，等你可以同超級英雄一齊管理健康。

針對打工仔同低頭族肌肉疲勞，佢哋同「罐頭豬 LuLu」或者 Marvel 聯乘嘅「超迷你按摩槍」就好啱使。細細支，放喺公司抽屜或者帶出街用都得，隨時用來鬆一鬆肩頸。仲有《鬼滅之刃》嘅無線充電夜燈鬧鐘，集合咗叉電、夜燈、鬧鐘功能，對於動漫迷嚟講，又係一件實用與情懷兼備嘅床頭好物。

XPower 聖誕精選產品一覽表