【第一部分：WhatsApp 空間大掃除】
長輩手機「爆廠」，兇手一定係 WhatsApp。佢哋未必識得定期刪相，積積埋埋幾年嘅「長輩圖」，閒閒地食你十幾廿 GB 位。唔洗裝咩清理大師，用 WhatsApp 內置功能就搞掂。第一招：擒賊先擒王——找出最佔空間的「元兇」
WhatsApp 其實有個好好用嘅儲存空間管理工具，一眼就睇到邊個 Chat 最食位。
步驟：
001：打開長輩 WhatsApp，去 「設定」(Settings) > 「儲存空間及數據」(Storage and Data)。
002: 撳入去 「管理儲存空間」(Manage Storage)。
003: 呢度個畫面好壯觀：
– 最頂會有個 「已轉發多次」(Forwarded many times) 嘅分類。呢啲通常都係罐頭片，唔洗問，全部刪除就啱，隨時清到幾 GB 出嚟。
– 下面會列出所有對話，按佔用空間大細排好。你會發現原來「XX同鄉會」群組食咗 5GB 位！
004: 撳入去最食位嗰個群組，揀 「全選」，然後狠心撳 「刪除」。(記得問聲長輩入面有無重要相要留底先，雖然通常都無)。
第二招：止血行動——關閉自動下載
清完舊債，都要防止新債。長輩好鍾意開住「自動下載」，人哋 Send 咩佢部機就收咩，連用緊 Data 都照下載，又爆位又爆數據。
步驟：
001: 同樣去 「設定」 > 「儲存空間及數據」。
002: 搵到 「媒體自動下載」(Media Auto-Download) 。
003: 將「使用流動數據時」同「使用 Wi-Fi 時」，入面嘅「相片」、「影片」全部 剔除 (關閉) 佢。
第三招：針對性打擊——清理個別群組媒體
有啲長輩好介意你一次過清空佢個聊天記錄，佢想留返啲文字訊息睇。咁我哋可以只針對入面嘅相片影片嚟刪。
步驟：
001: 進入你想清理嗰個目標群組聊天室。
002: 撳一下頂部個群組名，進入資訊頁面。
003: 撳 「媒體、連結和文件」(Media, Links, and Docs)。
呢度會曬冷列出呢個群組所有相片影片。撳右上角「選取」，然後你可以揀啲大容量嘅影片（通常係幾分鐘長嘅賀年片），一次過刪除佢哋，但又唔會影響到文字對話記錄。
【第二部分：還佢清靜——關閉煩人通知】
搞掂咗空間，就要處理噪音污染。長輩手機成日響，通常係因為加埋太多無謂群組，或者唔識分「個人訊息」同「群組訊息」嘅提示聲。
絕招：將群組全面靜音
最簡單直接嘅方法，就係將「群組」通知全面靜音，只保留真正重要嘅「個人」訊息通知。
步驟：
001: 去 WhatsApp 「設定」 > 「通知」(Notifications)。
002: 你會見到分開咗「訊息通知」(即係單對單) 同 「群組通知」(Group Notifications)。
003: 針對「群組通知」：
– 方法 A (最絕)： 將「顯示通知」直接閂咗佢。以後群組有新料都唔會彈出嚟，要入去 App 先見到。
– 方法 B (溫和)： 撳「音效」，揀 「無」(None)。咁樣有新料會彈出嚟，但唔會發出「叮」一聲。
