左定坤 (Cho Ting Kwan) 2026-08-06 18:06 | Samsung
由傳統應用互動轉向 Agentic AI 模式
喺近期嘅一場人工智能圓桌會議入面，Samsung 顧客體驗辦公室負責人兼企業執行副總裁 Jay Kim 詳細剖析咗 Galaxy AI 嘅未來走向。佢指出，整個行業同技術正由傳統嘅應用程式互動，逐漸過渡至更有主動性嘅 Agentic AI 模式。
App 唔會消失，但互動習慣將會改變
講到應用程式嘅去向時，Jay Kim 強調，應用程式並唔會消失，因為呢類產品喺流動裝置生態入面已經高度優化，而且好多業界公司都係圍繞住呢個模式建立業務。不過，用家平時使用應用程式嘅習慣就會隨住人工智能發展而改變。以往用家需要親自動手，喺唔同嘅應用程式之間來回切換先至做到嘢；而 Agentic AI 嘅核心目的，就係透過自動化去減少用家處理日常事務所需嘅手動時間。
採用行業標準 MCP 與過渡方案並行
講到技術嘅演變過程，Jay Kim 表示 Samsung 一開始係嘗試將人工智能同個別應用程式嘅功能手動拼接埋一齊，但呢種做法喺規模化嗰陣行唔通。到咗而家，業界出現咗稱為 Mobile Context Protocol（MCP）嘅標準，畀唔同嘅業界玩家可以透過共同標準去支援生態系統。不過，由於行業標準需要時間成熟，Samsung 亦同時推出咗一啲過渡方案，例如透過理解手機屏幕內容嚟幫用家自動完成操作，好似幫用家叫 Uber 咁。
技術仍在發展初期，全球擴展需審慎推進
不過，Jay Kim 亦好坦白咁承認「其實仲未係完美」。繼 Galaxy S26 推出首階段嘅自動化功能之後，佢形容呢個過程相當艱難，而家只係踏出咗第一步。除咗技術之外，全球有超過十億用家每日使用 Samsung 產品，所以品牌喺推動用戶體驗改變嗰陣必須非常審慎，確保成個生態系統同合作夥伴都向住正確方向發展。
照顧在地需求，未來將延伸至穿戴式裝置
面對地區市場嘅挑戰，Jay Kim 特別提到印度市場嘅語言非常繁複，並表示研發中心會同本地團隊緊密合作，投放大量資源去照顧唔同市場合理嘅在地需求。展望未來，隨住 Agentic AI 逐漸成熟，相關嘅用戶體驗唔單止會留喺手機上面，仲會擴展到智能手錶同智能眼鏡等穿戴式裝置，到時語音同視覺互動就會成為用家日常使用人工智能嘅主要方式。
來源：Gadget 360