左定坤 (Cho Ting Kwan) 2026-04-20 17:41 | Huawei
破格「短闊」比例，5.2mm 極致纖薄機身
有別於坊間主流嘅長條形摺機，Pura X Max 嘅機身設計非常破格。摺疊時長度只有 120mm，寬度 85mm，成個比例接近正方形，極之輕巧。展開之後，內層係一塊 7.7 吋嘅可摺疊柔性 OLED 屏幕（解像度 2584 x 1828），外屏則為 5.4 吋。內外雙芒都支援 1-120Hz LTPO 2.0 自適應更新率，以及 1440Hz 高頻 PWM 調光，睇片打機都夠順滑護眼。最誇張嘅係，部機展開厚度只有 5.2mm，摺埋亦只係 11.2mm，重量控制喺 229g。以一部大摺機嚟講，呢個重量同厚度絕對係頂級水平。外屏仲用上第二代崑崙玻璃，兼且支援 IP58 及 IP59 雙重防塵抗水級別（連高溫高壓噴水都頂得住），耐用度滿分。
麒麟 9030 Pro 坐鎮，預載 HarmonyOS 6.1
核心配置方面，官方參數證實 Pura X Max 搭載咗全新嘅麒麟 9030 Pro 處理器，配備 12GB RAM 同 512GB ROM，預載最新嘅 HarmonyOS 6.1 系統。今次系統深度整合 AI，加入咗「小藝伴隨式 AI」、「AI 靈感妙創」、「AI 隔空傳送」等多項超實用功能。網絡連接亦係滿血配置，支援 Wi-Fi 7、星閃 E2.0，仲支援雙卡雙待雙通，加埋 eSIM 功能，一部機可以同時處理多個號碼，對商務用家嚟講非常吸引。
5300mAh 巨電，續航力有保證
摺機最怕「倒水電」，今次 Pura X Max 喺咁薄嘅機身入面，竟然塞得落 5300mAh 超大電池。充電方面，支援最高 66W 華為有線超級快充、50W 無線快充，仲有無線反充功能。配合 HarmonyOS 嘅省電調度，續航力喺摺機界絕對有強大嘅競爭力。
紅楓原色影像，10 檔可變光圈加持
影相功能不嬲係 Pura 系列嘅靈魂，Pura X Max 今次搭載強悍嘅後置四攝陣列。首先係擁有 5000 萬像素嘅超光變主鏡頭，支援 F1.4 至 F4.0 十檔物理可變光圈，並且採用 RYYB 陣列同埋 OIS 光學防震。另外仲配備咗一粒 1250 萬像素嘅超廣角鏡頭，同樣係 RYYB 陣列。至於遠攝方面，就交由 5000 萬像素潛望式長焦鏡頭負責，擁有 F2.2 大光圈、RYYB 感光同 OIS 光學防震，提供 3.5 倍光學變焦同最高 100 倍數碼變焦，連微距拍攝都兼顧埋。最後當然唔少得第二代紅楓原色鏡頭，大幅提升整體色彩還原度同相片細節表現。
官方售價正式公佈，¥10,999 人民幣起跳
大家最關心嘅定價方面，官方亦都正式公佈咗 Pura X Max 嘅全系列售價。今次一共推出咗四個容量版本，入門嘅 12GB RAM = 256GB ROM 版本定價為 ¥10,999 人民幣，而 12GB = 512GB 版本就賣 ¥11,999 人民幣。如果想追求極致效能，仲有兩款「典藏版」選擇，分別係賣 ¥12,999 人民幣嘅 16GB + 512GB 版本，以及最頂配索價高達 ¥13,999 人民幣嘅 16GB + 1TB 版本。呢個價錢雖然企穩萬元大關，但考慮到頂級規格同埋獨特嘅闊芒設計，相信依然會有唔少捧場客。
小結
睇完詳盡規格，Pura X Max 無論係搭載麒麟 9030 Pro、擁有 5300mAh 大電池、頂級相機模組，定係得 5.2mm 嘅超薄機身，各方面都交出咗現時摺機嘅最頂級水準。佢嗰個 120mm 長度嘅獨特比例，相信會帶嚟截然不同嘅單手握持手感，係一部誠意十足嘅破格旗艦作。
