左定坤 (Cho Ting Kwan) 2026-07-14 11:49 | Nokia
有 AI 功能的 Feature Phone
Nokia 215 4G 2nd Edition 維持返 Nokia 一貫嘅實體鍵盤同細尺寸螢幕風格，賣點係夠晒襟用。最特別嘅地方係機身有個專屬 AI 按鈕，用嘅係 Sikey AI 技術 (嚟自深圳一間 AI 公司) 。用家只要動動口，就可以用 AI 幫手開電筒、開相機、Set 鬧鐘、提點自己或者直接打電話，甚至係問一啲簡單問題。對於唔想成日對住個螢幕嘅用家嚟講，呢種語音操作方式確實方便唔少。不過，根據 HMD 官方資料，呢個 AI 助手，仲未識聽中文。此外，裡面仲有一個叫 Xpress Chat 嘅功能，只要朋友或家人，係佢哋嘅 IOS 或者 Android 智能手機安裝同一個 App，就可以用文字甚至是 Video Call，令 Feature Phone 嘅朋友或老友記，都可以用最面對面嘅方法，跟家人溝通。
雙卡雙待，仲有 FM 收音機
硬體方面，Nokia 215 4G 2nd Edition 用咗 S30+ 系統，配備一個 2.8 吋螢幕。電量方面，機身用咗可拆式 1450mAh 電池，保證續航力。連接性方面都幾齊全，支援 4G 雙 SIM 卡、VoLTE 4G 通話、不用插有線耳機，都用嘅 FM 收音機、藍牙 5.0、3.5mm 耳機位，仲有 USB-C 叉電。另外，手機仲支援雲端服務，用嚟隨時睇到新聞、天氣或者體育賽事嘅簡單文字資訊。
AI 收費平過 gemini
至於大家最關心嘅 AI 收費問題，呢個 Sikey AI 服務頭 180 日係免費嘅。如果過咗期限想繼續用，就要俾錢續期。根據資料，國際版收費係每年 2.99 美元 (約 HK$24)，歐洲版就係 3.99 美元 (約 HK$32)。比起而家坊間動不動就要幾百蚊美金一年嘅 AI 訂閱，呢個價錢平好多。當服務就快到期，電話會喺 7 日前發出提醒，並彈出 QR Code，用家拎部智能型手機掃一掃及課金， 就可以搞掂訂閱程序。HMD 呢次動作顯示，Feature Phone 唔係只係懷舊產品，透過加入 4G 同 AI，將實體鍵盤手機再次現代化，你又 Buy 唔 Buy?
—
