- Ultra 大戰點揀？
分區列表
左定坤 (Cho Ting Kwan) 2026-07-17 16:51 | 網絡消息
由幕後技術供應商走到前台
COD Group 過去一直係本港電子錢包、繳費系統及電子禮券平台嘅技術供應商。今次推出「好賞買」，可以話係佢哋由幕後走到前台，建立自己消費平台嘅重大動作。行政總裁田公博表示，好多企業發放紙本禮券嗰陣，要處理採購、郵寄、核銷等一大堆功夫，數據又未必可以即時更新。「好賞買」就將成個流程電子化，企業可以批量購買同發放，仲可以即時見到核銷情況，慳返好多人手同紙張。對於企業嚟講，電子禮券除咗快之外，仲可以配合埋 ESG 同無紙化營運，變成企業管理同市場推廣嘅好工具。
超過 700 個品牌加盟
「好賞買」目前已經集合咗超過 700 個合作品牌，提供超過 4,000 款電子禮券，累積核銷量已經突破 100 萬張。合作嘅商戶類別非常多，包括美心、太興、譚仔等餐飲集團，亦有百佳、屈臣氏同 city’super 呢類百貨零售，仲有埋醫療服務同旅遊 eSIM。睇得出平台目標唔止係「買餐券」，係想將大家日常消費同生活服務集中喺一個 App 入面。
功能方便 轉贈送禮更容易
用家喺「好賞買」App 內就可以完成購買、儲存同核銷，唔使喺幾個 App 之間轉嚟轉去。App 入面仲有個地圖搜尋功能，幫你搵到附近嘅商戶優惠。買咗券之後，除咗自己用，仲可以透過 WhatsApp 等通訊平台一按轉贈俾親友，無論係生日送禮定公司抽獎都方便好多。比起傳統紙本禮券，電子版唔怕整唔見，商戶同企業亦可以更好咁掌握數據。不過，平台長遠留唔留到客，始終都要睇優惠力度同埋商戶覆蓋係咪夠廣。
聯乘 JOGUMAN 玩迎新優惠
為咗吸引用家，COD Group 今次搵嚟韓國人氣角色 JOGUMAN 合作，用家喺 App 內可以下載到主題模板，之後仲會有相關產品推出。App 推出初期仲有一連串迎新優惠，例如新會員禮券包、交易後送電子優惠券，仲有最吸引嘅「$1 搶券」同埋每星期指定品牌半價券。如果呢類優惠可以持續，相信會大大提高用家嘅使用頻率。
推動數碼公益
除咗商業禮券業務，COD Group 亦提到會發展數碼公益，利用平台技術幫中小型非牟利機構建立網上捐款渠道，減低佢哋嘅籌款行政成本。集團之前曾經喺緊急救援事件中，喺四小時內搭建好捐款平台，並且配合支付平台豁免相關費用。未來，集團計劃將呢個模式接駁更多移動支付平台，令市民捐款有更多選擇。
「好賞買」App 而家已經登陸 Apple App Store 同 Google Play。平台同時兼顧個人同企業市場，甚至延伸至公益，市場競爭絕對唔少，之後點樣維持優惠吸引力同埋提供獨家禮券，將會係「好賞買」能否突圍嘅關鍵。
