- HONOR Magic V6 超薄大摺實測
分區列表
左定坤 (Cho Ting Kwan) 2026-08-21 18:49 | 網絡消息
我成為了 ROBOT Phone 第一購買者
喺 HONOR 舉行新產品發布會之後，版主就第一時間預訂咗 HONOR Robot Phone 嘅 16GB RAM 配 1TB ROM 遠景灰版本。開售當日，即 8 月 16 日，早上九點幾，版主到達位於深圳萬象城嘅 HONOR 門市。雖然門市原定營業時間係早上十點，但係店員已經提早開門，版主亦幸運地成為第一位取機嘅顧客。
呢間門市採用類似 Apple Store 嘅高樓底同透明玻璃門面設計，上方印有 HONOR ALPHA 標誌。店內空間好大，設有兩層設計，陳列咗手機、電腦同手錶等多款產品，當中部分產品仲未喺香港推出國際版。產品包裝方面，HONOR Robot Phone 採用簡潔嘅黑色盒裝設計，隨機附送專用掛飾配件。
買內地手機退稅教學
喺門市取機嘅時候，如果想辦理離境退稅，記得要先要求店員協助處理相關行政手續。店員會喺現場準備退稅文件畀顧客簽署，隨後會列印出官方認可嘅收據同退稅申請表。用家必須妥善保存呢啲文件，以便喺離境口岸向海關申報。辦妥店內手續之後，小編帶同產品同文件前往福田口岸。離境退稅嘅辦理櫃台係位於通過內地邊檢（即係使用回鄉證辦理過關手續）之後嘅海關管制區內，唔係喺出境大堂外面。
到達退稅中心之後，流程如下：
● 001: 取號排隊：前往退稅櫃台領取辦理籌號。
● 002: 物品核驗：將購物收據、退稅申請表同埋未拆封使用嘅退稅產品交畀海關人員檢查，確保手機喺盒內。
● 003: 款項發放：完成核驗之後，就可以去另一個櫃台領取退稅款項。用家可以選擇透過 Alipay 或者 WeChat 掃描現場提供嘅 QR Code，以人民幣或者港幣形式即時存入個人戶口，亦可以選擇拎現金。
以今次購入嘅 HONOR Robot Phone 為例，最終成功退回 1,100 多元人民幣，折合大約 1,300 多港元，確實慳咗唔少。
港人內地買嘢退稅你一定要知嘅事
根據相關政策規定，境外旅客（包括持外國護照人士、持回鄉證嘅港澳居民同持台胞證嘅台灣居民）喺中國大陸連續停留唔超過 183 日，而且購物日期距離離境日期喺 90 日內，喺同一日喺同一間退稅商店消費滿 200 元人民幣，就可以申請離境退稅。退稅物品喺離境前唔可以開封或者使用。退稅率最高為銷售發票金額嘅 11%（部分物品為 8%），扣除大約 2% 嘅退稅手續費之後，就係實際退還金額。退稅金額喺 20,000 元人民幣以下，可以自由選擇現金或者銀行轉帳方式；如果超過 20000 元人民幣就必須透過銀行轉帳辦理。
▲ 影片有更詳細解釋
