左定坤 (Cho Ting Kwan) 2026-09-12 20:44 | Apple
開賣實況：搶到付款先話無貨
iPhone 18 Pro Max 今次開賣反應如常熱烈，尤其係 256GB 及 512GB 版本，開賣後短時間內已經變得非常難搶。版主今次由揀容量、揀顏色一路撳到付款位置，去到最後一步，頁面先顯示「沒有提供」。最初最快被搶清嘅係全新顏色，之後連黑色及銀色都相繼缺貨，睇落需求確實強勁。
2TB 最遲無貨 高定價用家卻步
不過，去到文章撰寫時，2TB 版本反而仍然可以最快安排 9 月 19 日到門市取機。呢個情況某程度上反映，大家對 2TB 容量興趣唔算大，最大原因應該係售價太高，未必人人願意為多一倍容量付出幾千元。（去到 20:37 左右，連 2TB 都搶完)
細容量最難搶 會唔會有炒價？
256GB 及 512GB 版本供應緊張，加上新色有一定新鮮感，短期內確實有機會出現少量溢價。對於唔想等貨、又指定要某種顏色嘅用家，可能會願意畀多少少錢直接買現貨。但「難搶」唔等於一定「有得炒」。Apple 後續可能會陸續補貨，電訊商及授權零售商亦未必同步缺貨。當供應逐步增加，最初嘅溢價好可能會快速收窄。而且今次缺貨主要集中喺 256GB、512GB 及部分新色，2TB 好似才斷貨，代表市場需求未必係所有版本都一樣強。高容量版本成本太高，轉手時反而更加難搵到接貨買家。
自用值得開心 單純炒賣風險高
版主覺得，如果本身真係想用 iPhone 18 Pro Max，成功搶到貨當然值得開心；但如果純粹諗住買嚟炒，風險仍然唔細。扣除平台費、交通、資金成本及保養問題後，最後可能只係賺少少，甚至要蝕讓出貨。今次最有機會出現短期溢價嘅，應該係 256GB 或 512GB 新色，但會唔會真係炒得起，仲要睇 Apple 補貨速度，以及市場願意畀幾多錢。大家成功搶到未？又會唔會考慮放出去試下炒價呢？
