旗艦店部署過百部展示機 紐約 Fifth Avenue 設專屬專區
根據彭博通訊社最新一期《Power On》專欄報道資料顯示，位於美國紐約市嘅 Fifth Avenue 旗艦店將會成為今次推廣嘅重點門市，預計場內會擺放超過 150 部 iPhone Duo，分佈喺多個上手試玩專區及店內陳列設施之中。同時，該店亦會設立另一個專屬嘅特色體驗區。
至於 Apple 總部所在地嘅 Apple Park Visitor Center，亦計劃提供接近 100 部示範機。其他主要城市嘅重點門市，包括芝加哥嘅 Michigan Avenue、洛杉磯嘅 The Grove 以及曼克頓嘅 Upper West Side，預計各自亦會獲分配大約 30 至 40 部新機。相比之下，一般非旗艦門市平均只會獲配大約 20 部示範機，代表用家如果想喺非旗艦店上手試玩，可能需要花更多時間輪候。
全新展示底座登場 示範開合過程兼支援免綁繩試玩
為咗令每位行入門市嘅顧客都能夠一眼睇到呢部全新摺疊機，大部分 Apple Store 都會增設第二張 spotlight table，即係店內白色枱面、中間設有支架嘅專用陳列枱，專門用嚟展示 iPhone Duo。消息指，Apple 更特別研發咗一款全新嘅機械展示裝置，可以自動示範裝置打開同埋合埋嘅過程。
店內枱面亦會換上全新設計嘅 MagSafe 底座，能夠同時固定一部打開狀態嘅 iPhone Duo 以及兩部標準版 iPhone，方便用家即場對比螢幕尺寸與機身差異。此外，Apple 喺店內兩側稱為「Avenue」嘅互動牆展示區，準備咗冇綁上防盜防跌繩嘅自由體驗機，畀顧客親身試玩裝置全新嘅 StandBy 模式，毋須受限於枱面固定支架。
引入專用 Presto 系統 未拆盒已預先無線更新系統
除咗陳列硬件，Apple 亦早已在零售店部署名為 Presto 嘅專用系統，讓店員毋須拆開原裝包裝盒，就可以隔住盒身為 iPhone 無線更新 iOS。Apple 早於 2023 年開始測試相關技術，並於 2024 年披露擴大部署計劃，主要目的是避免顧客買到仍然使用舊版系統嘅新機，減少開箱後需要即時下載及安裝更新嘅等待時間。
今次 iPhone Duo 更引人注意嘅地方，在於 Apple 據報將為美國 Apple Store 買家提供首次開機畫面個人化功能，讓手機喺顯示「Hello」時，同時加入買家嘅名字，例如「Hello, ePriceHK」。不過，現階段仍未完全確認呢項功能係咪直接透過 Presto 實現，亦未有消息證實香港 Apple Store 或其他網絡商會否提供同類安排。
來源：Bloomberg
