姜濤代言？香港電訊推 HKT.AI 平台！月費 $48 起玩齊圖片影片生成-ePrice.HK

左定坤 (Cho Ting Kwan) 2026-10-08 16:05 | Csl

香港電訊（HKT）今日正式推出自家「HKT.AI」一站式 AI 平台。官方近日釋出宣傳海報，口號為「#開拓AI盛勢 AI ON. FEAR GONE.」，更預告有一位「神秘人物」即將現身。雖然官方目前只係貼出一張背影相，但網上討論指，呢位神秘代言人極有可能係姜濤。新平台主打深度本地化體驗，整合圖片、寫作、簡報等多款 AI 工作室，月費由 $48 起。

傳姜濤擔任神秘代言人
HKT.AI 官方社交平台最近出咗個新帖文，預告會有位「神秘人物」同 HKT.AI 一齊亮相，仲大賣關子問大家佢會點樣玩轉新平台。從官方釋出嘅背影相睇，無論係髮型定係身型，都同 MIRROR 成員姜濤非常相似。雖然目前純屬市場傳聞，官方未有正式確認，但已經引起唔少用家同鏡粉嘅關注。

一站式 AI 工作室支援日常應用
根據資料顯示，HKT.AI 標榜係一個匯聚全球同中國內地 AI 資源嘅單一平台。系統整合咗多個常用功能，包括簡報工作室、影片工作室、社交內容工作室、寫作工作室同埋圖片工作室，等用家可以喺同一個介面完成各項創作。廠方亦強調平台提供深度本地化同企業級安全保障，更設有 24 小時 AI 專人支援熱線同埋免費課堂，協助用家熟習各種 AI 操作。

四大月費計劃，1O1O 及 csl 客戶享免數據
收費方面，HKT.AI 採用月費訂閱制，承諾期為 24 或 36 個月，每月積分會定時重置。入門版 Plus 計劃月費為 $48，包每月 4,800 AI 積分同 10GB 儲存空間；進階版 Pro 計劃月費為 $168，包 18,000 積分同 50GB 空間；高階 Advance 計劃月費為 $588，包 70,000 積分同 150GB 空間；而最頂級嘅 Ultra 計劃月費為 $1,388，提供高達 170,000 積分同 300GB 空間。如果用家本身係 1O1O 或 csl 指定服務計劃客戶，透過本地網絡使用 HKT.AI 時，更可以豁免相關流動數據用量。

來源：HKT.ai