現有手機自動連線 4G 5G 一般用家無須特意設定
好多朋友一聽到熄 3G，第一反應可能會問「聽日我有冇嘢要跟進」。其實依家市面上絕大多數用家手上攞住嘅 iPhone 或者各款智能手機，完全唔需要做任何動作。新一代嘅 iPhone 系統 Firmware一早已經取消咗鎖死 3G 網絡嘅設定選項，系統喺平日運作嗰陣，本身就會優先而且自動連上 4G LTE 或者 5G 網絡。
除咗手機系統自動適應，SmarTone 本身亦一早冇再提供純 3G 服務計劃，就連儲值市場亦幾乎搵唔到純 3G 產品嘅蹤影。官方數據指出，截至 2026 年 6 月，真正仲使用緊 3G 網絡嘅客戶比例，只佔整體用家總數大約百分之一，影響範圍極之有限。
珍藏舊機連線成絕響 收藏級 3G 機只剩兩間電訊商過冷河
今次受影響嘅主要對象，實際上只剩低極少數依然揸住老舊 3G 單模手機嘅用家，以及鍾意玩古董舊機嘅收藏愛好者。對於平時鍾意儲舊款經典手機、得 3G 連線模組嘅玩家嚟講，如果想插卡開機懷念舊時代嘅介面同手感，隨住 SmarTone 熄機，目前喺香港就只剩返 csl 同 3HK 兩間網絡商嘅 3G 網絡可以勉強連線上網或者打電話。不過以各大電訊商重組頻譜資源嘅進度嚟睇，全面淘汰 3G 亦只係遲早問題，留畀呢批舊機實際連線嘅時間已經指日可待。
▲ AI 示意圖
門市熱線提供支援 長者用家可獲專人跟進
為咗處理極少數仲用緊舊網絡嘅客戶，SmarTone 其實自去年起已經透過短訊發出提示，並提供免費更換電話智能卡服務、升級優惠同埋網上設定指引。針對屋企有長者或者對科技產品運作唔太熟悉嘅用家，SmarTone 門市同 24 小時客戶服務熱線都會繼續解答查詢。如果個別長者客戶未能及時睇到短訊，客服團隊亦會主動透過電話聯絡跟進，提供相應協助。
隨住流動通訊全面邁入 5G 階段，3G 網絡退役純粹係網絡技術更替嘅必經過程。一般手機用家聽日照常返工放工，網絡連線完全唔會受到影響；手頭上若果真係仲有長輩用緊純 3G 老人機，先需要趁今日幫手檢查手機係咪支援 4G 網絡或者安排換卡
